New Year Pooja with Trump 😉

டிசம்பர் 30 தொட்டே புதையா ஏரியா அல்லோலகல்லோலப்பட்டது. சிட்டி சென்டர் தாண்டினதுமே டிராபிக் ஜாம்தான். எல்லா வண்டிகளும் பம்பர் டூ பம்பர். சென்ற வருடங்களைக் காட்டிலும் இம்முறை பாதுகாப்புக்கு ஏக கெடுபிடிகள். வண்டிகளின் போல்ட் நட் வரையிலும் கூட கழட்டி சோதனை செய்தார்கள்.

புதையா ஹைவேயில் யாரும் தப்பித்தவறி கூட டயரை எரித்துவிடக்கூடாது என்பதற்காக ஒரு மாதமாகவே டயர்களை வாங்க/விற்க தடை விதிக்கப்பட்டிருந்தது. எல்லா வண்டிகளிலும் ஸ்டெப்னிக்கள் பறிமுதல் செய்யப்பட்டுவிட்டன. பழைய டயருக்கு பஞ்சர் ஓட்டினால் கூட 3 மாதம் சிறை.

ஏன் இந்த தடவை இவ்வளவு கெடுபிடி? அராஜகமா இருக்கே.. போன வருஷம் பஹ்ரைன் ராஜாவே வந்தப்போ கூட இவ்வளவு கெடுபிடி இல்லையே? மக்கள் பேசிக்கொண்டார்கள்.

ஆம். கடந்த சில வருடங்களாகவே ஆங்கிலப் புத்தாண்டு தினத்தன்று ஷ்யாம்ஜி வீட்டு பூஜையில் வளைகுடாவிலிருந்து அரபிகளும் ஏகமாய் கலந்துகொள்கிறார்கள். அதிலும் சிலர் பஞ்சகச்சம் உத்திரியம் சகிதம். முத்தாய்ப்பாக சென்ற வருடம் பஹ்ரைன் ராஜாவே (நவீன) ரத தாசேர பதாதிகளின் புடைசூழ கலந்துகொண்டார்.

இவ்வளவு கெடுபிடி இருக்கே, இந்த தடவை ஸ்பெஷல் கெஸ்ட் யாரா இருக்கும் என மக்கள் மத்தியில் பரபரப்பாக இருந்தது. "ட்ரம்ப் வரப்போறாராம். கூடவே அவர் பொண்ணு இவங்க வருதாம்", கொளுத்திப்போட்டார் யாரோ ஒருவர். "அது இவங்க இல்ல. இவான்கா" என்று திருத்தம் செய்தார் மற்றொருவர்.

ஷ்யாம்ஜி வீட்டிலும் ஏற்பாடுகள் தடபுடலாகவே இருந்தது. ஆனாலும், அந்த ஸ்பெஷல் கெஸ்ட் யாரென்று ஷ்யாம்ஜி யாரிடமும் சொல்லவே இல்லை. அட.. பத்மா மேடமாவது சொல்லட்டுமே.. ம்ஹம்.. "அது எனக்கே தெரியாதேட்டேளா. ஷ்யாம் ச்சொல்லவே இல்லை.." என சமாளித்தார்.

1ம் தேதி நிஜமாகவே ட்ரம்ப் வந்தேவிட்டார். பூஜைக்காக வந்த கூட்டம், ட்ரம்ப்பை பார்க்க வந்த கூட்டம்.. அவரை விடவும் இவான்கா-வைப் பார்க்க வந்த கூட்டம் என ஆண்டலஸ் கார்டன் முழுதும் கூட்டம் அம்மியது. பலரும் ட்ரம்ப்பை பார்த்து கைகுலுக்கி செல்பி இன்ன பிற... எல்லாம் சிறப்பாக முடிந்தது. கொஞ்சம் கொஞ்சமாக அனைவரும் கலையத்தொடங்கினர்.

"கடைசி வரைக்கும் இவான்கா-வை பாக்கவே முடியலியே" என்றார் ஒருவர்... "அவ்வளவு கூட்டம். ஷ்யாம்ஜி வீட்டு பூஜைன்னா சும்மாவா.. அதுவும் ட்ரம்ப் வேற.. அடுத்த வருஷம் வருவாங்க, பாத்துக்கலாம் வா" என்றார் மற்றொருவர்..